(Ni)je po Štatutima: Križevačko veliko spravišče 2010 – Komendija ni zvršila…

La commedia (non) e’ finita, iliti komedija (ni) gotova! Komendija (ni) zvršila… Ide dalše, kak da niš ni bilo lanjsko leto, gda smo umesto tradicionalne spelancije po štatutima o pomirbi kalničkih šljivara i križevačkih purgera (na „najlepšem placu vu Europi“) imeli čast gledeti mjuzikl iz zagrebačke Komedije. Onda je zgledelo da se nekaj takvog pokondirenog ne mre više ponoviti. Nu, prevaril sam se, kajti je legenda i doajen (kak se to učeno veli) horvatskoga glumišta, nadmašil sebe samoga. Pretvoril je križevačku legendu o štatutima u legendu o sebi samome.

Kak drugač rastumačiti  to da je na pozornici  sinoč  sam sebi dizal spomenika kak još živuči i dobro držeči (a ne bivši) Vladek Štefančić, za kojeg neki misliju da je Pero Kvrgić. Bil je na Štrosu i ceremonijal majstor na bini, pripovedač, grabancijaš-dijak, vicmaher, stvoritelj mjuzikala, najavljivač koji gosta popevača podseča kak ga je negda on (Štefančić) dopelal vu kazališče. Da se ipak ne bi preveč samo sebe  reklamiral predstavil je i gdo je varoški sudec (Stipica Palijan), notarijuš (Zlatko Kopsa), kalnički kaštelan (Stiv Vrhovec), mladenac Julček i nova Tilčika. Zvezda večeri pajdašije bila je Danijela Pintarić, prvakinja zagrebačke Komedije koja je otpopevala z petnih žila “Ave Mariju” i druge popevke iz rock-opere “Gubec beg”, u čem su joj se pridružili i dečki z Kvarteta “Gubec”. Potlam svega čuli smo još i popevku “Kaj bu bilo z nama zutra” iz “Jalte, Jalte“. I to gda sam se več poveselil da ne bu na Spravišču reprize “Jalte, Jalte”.

Nu, kak je rekel Vladek Š., taj se mjuzikl ponavlal 534 put vu Zagrebu i 50 put vu Slavonskom Brodu. Pak kak bi to zgledelo da ne bu barem dvaput vu Križevcu? I to na Spravišču – najvekšoj i najtoplejšoj PAJDAŠIJI na celome svetu, kak je to Križevčancima kadil preštimani gospon Štefančić .

Čuli smo da je Spelancija čist nekaj drugega, kajti se ne mre živeti od prošlosti i nostalgije “za dobrim starim vremenima”.

I gradonačelnik Hrg je najavljival da Spravišče ide u čist drugom smjeru nek negda. Europskome? A jel to baš onaj pravi smjer? Jel je to čuvanje tradicije o nastanku Štatuta, jedinstvenih regula ponašanja u veselim društvima? Koje verli gospon Štefančić meče iza regula jenoga kanonika od pred 200 let o tomu kak se (ne) treba obnašati za stolom; da se ne sme s jezikom cmoktati, kosti oglabati, pajdašice štipati i puce pod stolom z prstima  za gače petati. Zaslužil je V.Š. i više od štrofa s mlakom vodom. Moral ga je varoški sudec poslati naj ide za drugi stol, vun z pajdašije. Je, bilo je zbilam velko iznenađenje i venčanje Tilčike i Julčeka koji su priznali da su “vre napravili ono”.

I publika je, naravski, pucala od smeha. Štatuti su sponova ostali regule za pijance, a ne bonton ponašanja, preštimavanja Domovine, Pajdašije, Pajdašica, lepe Govorancije. Ne mre se reči, lepo se tancalo (kajti su bila tri orkestra) na dve pozornice. Lepo se popevalo, kajti su osim Danijele bili i naš Štef Fortuna, popevači iz HPD-a “Kalnik” i iz Kvarteta “Gubec”.

No, prava Spelancija o pomirbi je, ipak, nekaj drugo. To je i legenda (istina, na pol zmišlena) o seljakima-plemenitašima i purgerima z kralevske varoši. To je pučko kazališče s karakterizacijom likova koje su svojevremeno opisali i Antun Nemčić u “Kvas bez kruha ili kako se bira veliki sudac”. Opisao ih je i ludbreški spisatelj Mladen Kerstner, autor poznatih Gruntovčana, koji je taj humor sa špranjom udahnuo i kalničkim šljivarima i križevačkim purgerima. Dolazili su ovamo i poznati zagrebački glumci, ali oni su se uigrali u križevačku priču. Fabula sa zapletom je uvijek ista – pokušaj pomirbe nakon višestoljetnih svađa i gda zgledi da je venčanje  zapečatilo pomirbu, sponova  se posvadiju. I time na koncu jednoga Spravišča započinje  novo, za drugo leto. I u tome je smisao.

Živlenje je kak reka ili potok kaj teče od izvora do ušča. Ono je kak pozornica na kojoj se menjaju glumci, ali stvarne uloge ostaju i potlam Spravišča. Poruka je da se voli onaj koji se svadi i da treba slaviti radost živlenja, kajti je ljudski vek ionak preveč prekratek. Zato ostaje  legenda, ostaje priča med ljudima. Priča postaje običaj, navada i način živlenja. Živi i onda kad odemo vu ono zadnje podzemno kazališče pri Svetome Roku. Zato mi je žal da ima onih koji se iz petnih žila trsiju da se zatrgne tradicija pod izgovorom da je to več staro i nemoderno. Pak zovu u pomoč velike zvezde z velike varoši koje našu domaču Spelanciju delaju onak kak znaju i moreju, po starim notama iz starih mjuzikla. Po receptušu Hamleta vu Mrduši Donjoj.

Sponova bum kak i lani pital, zakaj tak ne delaju i Đurđevčani na Picokijadi i Koprivničanci s Renesesansnim festivalom? Zakaj se Jalta i Gubec beg ne popevaju i na otpiranju Dubrovačkoga festivala? Zato predlažem Križevčancima i onima kaj se tak osečaju, da se vu varošu raspiše referendum u obranu naše tradicije i pučke kulture. Jel očemo starinsku ili modernu Spelanciju? Spovedimo se o tomu “Sine ira et studio”, bez ljutnje i pristranosti, bez političkog i svakog drukčijeg  farbanja i stege. Makar slutim da bu dost onih kaj buju rajše glasali za popevačice iz Komedije nek za purgere i šlivare. Makar med njima bile i domače puce z Gornjega varoša ili Kalnika. Kajti, na žalost, sve više se preštimava sve kaj je stranjsko, a podcenjuje domače.

Podsečam, za Četrdeseto Spravišče se raspisal javni natječaj od čega se, poslije, ne znam zakaj, odustalo. Pak izgleda  da je glavni scenarist i režiser Spravišča i Spelancije gradonačelnik, makar bu rekel da je za to vreme vlast prepustil varoškome sucu. A baš se Hrg prije zdušno zalagal za izvornu Spelanciju i naglašavanje društvenih i kulturnih vrijednosti Štatuta. 

Možda vam se svidi

Komentari su zatvoreni.