Navek na 1. sečnja podvlečem crtu pak velim – da vidim kak je bile i kak bu. Pak prvo zvadim šrajtoflina jer on najbolše veli kakva je situacija kaj se penezof dotikavle. Gda bi veroval da penezi kvare ljude, mogel bi komotno reči da sem najbolši čovek na ovom svetu a i šire. Skroz ne pokvaren i čist, bi rekli kak mala beba. Ali, ruku na srce i brez penezov je ni moči.
Delal bum inventuru sega i svačega, jer tek gda to se skup zbrojim i preračunam, onda mi zide prava slika, ali ne onak, statistčka, nek istinita, onak kak mi ju je živlenje zapisalo.
Idem mam na posel dok vi spite, a i moja Pepica spi, pak bu blaženi mir, a za ozbilne stvari delati, mir i tišina su na prvem mestu. A prav da vam velim, če se o penezima dela, Pepica baš i ne mora se videti i znati.
Gda sem se nagledal v šrajtoflin, situacija je bila kak sledi:
KOVANICE
- lipa (10) kom 1
- maslina (20) kom 0
- vel. degenija (50) kom 3
- slavujček (1) kom 6
- tuna (2 ) kom 1
- medek (5) kom 4
(Moram napomenuti da one skroz drobne lipičke nisem ni brojil, ali bile ih je par komadov.)
PAPIRNATI PENEZI
- Frankopan i Zrinski (5) kom 0
- Juraj Dobrila (10) kom 2
- Jelačić (20) kom 3
- Gundulić (50) kom 1
- Mažuranič (100) kom 1
- Radić (200) kom 0
- Marulić (500) kom 0
- Starčević (1000) kom 0
(Pak moram napomenuti da Radića, Marulića i Starčevića nisem videl več nekoliko let, pak se razme da ih nisem našel ni v mojem šrajtoflinu).
REZERVNI PENEZI
Predi nek o njimi nekaj natuknem, pak moram složiti male pojašnjenje. A radi se o medekima.Čim se moja Pepica vrne z Varoši z trač partije, mam prekontrolera če su joj povrnuli kojega medeka. Pak če ga najde v svojem šrajtoflinu, mam ga ftekne v kasičku od čmelice Maje da bi bile za črne dane, kak ona veli. To poštivlem, jer da ona ni tak šparna, več bi nam davne hižna ekonomija odišla v likvidaciju. Ne same da poštivlem, nek sem jeden dan štel da bi kakti pobrisal prašinu, pak dignem kasičku da bi i spodi nje, i taj čas zleti njoj dno , a si penezi vun. Su se otkoturali po otomanu, kraj njega, spodi njega i šte zna kam se ne. Male sem se splašil da ne bi taj čas moja Pepica došla, pak bi nedaj Bog mislila da sem imel zle namere. Na brzinu sem se pokupil, del v kasičku a nju na mesto.
Nakon jeno dva tri dana nekaj sem muval kraj otomana, kad gle – dva medeka. Zemem ja njih, pogledim kasičku pak v nebe da vidim jel dragi Bog gledi, pak sam sebi povem – bolše da kasičku više ne diram – pak sem peneze pospremil v moj šrajtoflin da bi mi morti dobro došli za parkeranje.
I to su mi sad ti REZERVNI PENEZI. Če dojdem v krajnju nuždu, same male spužem na kolenima oko otomana ili gurnem glavu v kut, i garant, bar jeden medek je tam. Bute me razmeli. Nemrem sad povedati kulike ih još ima jer ni sam ne znam, ali ih ima.
NEKRETNINE
Tu nemam kaj pune nabrajati. Imam stanje pol-pol z mojom Pepicom, ali se nemreme složiti kulike vredi. Ja velim da vredi više, a ona pak da vredi menše jer još ni dovršeno a delamo ga več 30 let. Pak bi tu trebale delati procenu, a sad v recesiji to ne bi bile pametne.
Imam ja još jenu nekretninu, bi rekli «mrtvi kapital», ali o tome sad ne bi.
POKRETNINE
Je, tu bi se več nekaj našle. Glavna moja pokretnina je moja Pepica kaj je još fest pokretna. Saki dan hodi na plac, pak onda na kavicu a tam čuje šte je koga i zakaj. Nebi ja ni znal nek je tam čula da je treba popisati i umetnost, pak vure, onda povedati kak stojim z računima v banki i da nisem možda, ne daj dragi Bogek pral peneze. Ma kak bi ih pral gda nam vešmašina trokera več šest meseci, a na ruke si ni štumfe nečem prati če ih moja Pepica ne opere. A onda su spominjali i limuzine, a ja sem se splašil da sem tu možda nekaj zatajil, ali ne namerno nek iz neznanja. A Pepica mi je povedala da me neznanje na špašava.
Dobre, del bum limozinu, ali da znate da je kuplena na kredit. Komplet poperi su pri banki, i se je moči videti. Čak i da sme kredita poštene otplatili. Stara je 6 let, i vele da vredi skroz male.
Za umetnost si nisem ni mislil da to tulike vredi. Znal sem i predi da imam tri slike kaj ih zoveju potreti, a meni je moj vreden jer sem ja na njemu, onak lep i pametan. Poklonil mi ga je Profesor, a čim mi ga je poklonil ja sem mislil da mu ni dobre zišel pak mi ga je za te i dal. Još sme se i pokarali jer sem napomanul da mi fali jena dlaka na bradi, a on je kričal da je niti ni bile jer bi ju on sigurno nafarbal. A pokarali sme se predi nek je on rekel da mi poklanja, a ja sem dlaku same spomenul da bi mu zrušil cenu.
Posle sem ja tek saznal kaj portret vredi. To vam je onak, kak da ga je složil Vlaho Bukovac, a to si nemre saki privuštiti. A Profesor je bormeš dober kak i Vlaho, če ni i bolši.
Onda sem zaklučil da bi te mogla biti dobra invešticija, pak sem dal nek namusiče i moju Pepicu a čak i maloga Pepeka. Za Pepeka sem rekel da bu njegov portret menši, gda je i on mučki, pak sem mislil da bu portret jeftineši, ali se Profesor ni dal zmesti jer zna svoju cenu.
Nazadnje je zišlo da sem bogat, kaj se portretov dotikavle, a ni kriv ni dužen. Bum ih zapisal.
Ali, čim sem male bolše pogledel po hiži, smrznul sem se od straha. Pak je moja cela hiža umetnost. Se je pune slika i kipecov, a če mi dojdu financi, kak bum dokazal da sem se to ja složil. Z mojimi zlatnim rukami, pak mi zide da se kaj doteknem postane umetnost. A nije da sem ja to štel. Nek mi je ostale male farbe gda sem farbal stolariju, pak da ne bi odišla f kvar, sem rekel da bum nekaj i ja namusal, a mojoj Pepici se to lepe vidle pak mi je povedala nek nesem na izložbu. Sem ju posluhnul, a kritika je povedala da imam «smeđu fazu» jer oni su ni znali da mi je smeđe farbe ostalo pak sem z njom namusikal.
A jenput sem nesel i plavu sliku, dok sem farbal plafona, a z žutom sem namusikal meseca i zvezde. Meni je bile smešne gda je kritika povedala da je to «plava faza z impliciranom žutom» a da v koncepiciji zastupam eksploziju vnutarnjih emocija. To z eksplozijom mi se baš i ni vidle onak, jer kaj se eksplozija dotikavle tu se nisam mešal.
Najgorše od sega mi je bile kaj je te slike vidla likovna publika, a ja ih više nemam pri hiži. Jenu sem dal teci Danici za rođendan, a drugu maloj Jaciki gda je išla zamuž. I gda bi došli financi, ja ne bi mogel dokazati da to ni neevidenterani prihod iz sive ekonomije, a ja nisem stekel nikakvu dobit kaj ne bi platil poreza.
Ove kaj su doma bum popisal, a čez lete bum vodil evidenciju kaj je vlezle v nuter a kaj je išle vun.
Vure najrajše ne bi ni spominjal. Imam ih 3 komada ručnih i 8 komada zidnih. Ali, za saku imam objašnjenje kak sem do njih došel.
Ručne vure – kom. 3
Najstareša i najvredneša mi je ona koju sem kupil 1963. leta v Splitu. Zove se RAKETA i ima 17 jevels. Još ide, ali joj se potrgal mali cajger, a to više nišče na ovom svetu nemre popraviti pak sem ju moral pospremiti kakti uspomenu. Da, a kupil sem ju od penezov koje sem dobil gda sme igrali v Milni na Braču kak mužikaši. Je koštala jenomesečnu plaču, ali moral sem ju imeti.
Ovu treču sem kupil gda mi se ona prva zdošla. Dal sem za nju 75,00 kuna, ima čudno poreklo, ali ide kak da je švicarska. Pri meni joj je poreklo poznato; kupil sem ju od zadnje crkavice kaj se zove penzija, jer brez vure jednostavno nemrem.
A ona druga, stara je 30 let, a dobil sem ju za rađendan od moje Pepice. Dal bi glavu da je za nju dala jednu celu ondašnju plaču, ali nigda ni išla kak bi joj marka trebala garanterati. Ma ni nikak išla jer je kazala datume, pak je sama sebe zmešala da ni znala ni kulike je vur a kamo li koji je datum. Nisem se ufal to nigda reči mojoj Pepici jer bi joj srce puklo od tuge za tulike peneze. A ja, odonda više nigda nisem prefereral svetske marke. Vura je i sad tam, v gredencu, ali joj je vrednost 0 kuna.
Zidne vure – kom. 8
Bormeš ih je preveč. Ali za jenu znam 100 % da ju je moja Pepica dobila gda je išla z jenog posla na drugi, pak su joj oni od kud je odišla dali jenu vuru za spomenek i dugačko sečanje. To je ona lepa z drvenim okvirom.
Onu popernatu sem ja dobil od jenog prijatela koji je naivec, pak mi ju je dal, ali još je živ pak to more posvedočiti. I to ni mito i korupcija, nek prijatelstvo.
Ja sem živi svedok da je moja Pepica jenu kupila v marketu jer je povedala da joj baš takva treba koja zgledi kak tanjur pak da ju bu dela v kuhinju.
Onih drugih pet komada sem ja složil sa svojim zlatnim rukami, a več sem vam povedal da su zlatne pak kaj oko vidi to one slože. Više bi došlo da su one se skup, nekak onak kak suveniri.
Da sad ne bi računal, i sami znate kulike bi suveniri mogli vrediti.
S početka mi se to i lepe vidle imeti tulike vure. Su kuckale, ali nigda ih nisem mogel natirati da idu onak, jednake, na sekundu. Ali sekunde su išle, pak i minute, a bormeš i vure. Išli su i dani, meseci i godine, i jenoga dana sem se splašil da to one meni kucaju i broje kulike mi je još ostale. Onda sem iz svih zvadil baterije, a same sam jenu ostavil da ide, a i ta mi je preveč.
Još predi nek spomenem sredstva na računima sih banki, moram priznati da sem ipak male praznoveren.
Na staro leto sem išel s jenom lepom deklicom na kavu, baš mi ni pasale zbog termina, ali sem štel da mi 2010. ostane v lepom sečanju, a ona more biti same za lepo sečanje.
Onda sem išel v banku pak sem odročil onu štednju od crkavice, kaj se zove «sad me vidiš, pak me ne vidiš». I moram priznati da sem vun zel jenoga Mažuraniča, a to je onaj kaj sem ga predi zapisal. A zakaj? Za te jer narodna mudrost veli – kaj je prvog dana v šrajtoflinu, tak bu i celoga leta. Me razmete, moral sem tak složiti.
A, je! To kaj je na računu sem rekel da bu gda pem sv. Roku, ali ne da bi mi kupili podstavlenoga lesa jer mi je navek zima, nek za mužiku. Bi štel da mi igraju – za saku dobru reč – a to oni za socijalno ugrožene ne bi nikak šteli platiti. Če je za mužiku, onda znate kulike je.
I kaj da vam još rečem? Se sem rekel i objasnil, a če sem nakaj pozabil, ni bile namerno. Da, imam još i dve mačke, ali nemreju imeti male miceke, pak ni moguče da bi tržil mačke u vreči ili brez vreče, jer bi to bila siva ekonomija. One su kučni ljubimci i nikaj više od toga.
A jenput mi je i moja Pepica rekla da sem i ja kučni ljubimec. Mi se to nekak lepo vidlo a onda je nadovezala:
- Ja te mazim i pazim, ranim te i čistim za tobom, a ti same delaš kvara i kojekakve huncutarije. Dosta je toga!
Komentari su zatvoreni.