Prigorski čuček

Čim sme mi Hrvati izborili svoju Državu, je sem mam profiteral; postal sem gospon, dobil sem uvoznu lemuzinu, a rekli su mi da sem sad i kapitalista. S početka mi je bile čudne gda su stalno kričali – gospon Joža ovo… gospon Joža ono ali, male po male sem se i privčil. Kaj se pak lemuzine dotikavle, tu sem se znal i rasrditi. Kakvi je to vražji uvozni avtomobil gda sem ga saki drugi dan moral popravljati. Pak je to bil stojadin, ali v knižički je pisale – uvozni.

 

Kaj se pak kapitalista dotikavle, tu i ja nisem bil skroz na čistem. Sem znal da su to oni kaj imaju pune penez, pak onda tiraju businesa ali meni je došlo da nemam ni za cigaretline pak kak morem onda biti kapitalista? Onda sem se zmislil, pak pitam ja moju Pepicu:
– Pepica, si ti morti skrila koju marku iz onog trulog socijalizma? – a znal sem da bu na mene zakričala čim spomenem peneze pak sem se male meknul v kraj i posluhnem kaj bu rekla.
– Nikakve peneze ja nisam skrila, mulec jedan – veli meni Pepica – ja sem njih uložila, v banku. I, to više nisu marke nego euri i to ti je, moj Joža, kapital, bez obzira kak se zvali. Ali kaj ja to tebi pripovedam, kad ti to tak i tak ne razmeš.žNisem ništ rekel nego sem si mislil svoje; če Pepica ima kapital, a v braku je se naše, onda sem i ja kapitalista. I mam sednem na biciklina i odem kumu Laciju po savet. Se on navek bavil nekšnim businesom pak bu morti i meni nekaj preporučil. Spripovedam ja njemu o čem se dela, a on meni brez razmišljanja:
– Čučeke Joža, čučeke treba raniti. Pak buš tržil jajca po kunu. Sto jajca, sto kuna. Pri nami. A moreš ih i v Zagreb pelati pak bu i više. I meso ti ostane, a i to j e moči stržiti… No, je ti dam mam 10 komadov piščencov, pak si pomori. Em, sme kumi.žNisem stigel reči ni da, niti ne, i fakat, kum Laci zeme škatulicu od nekšnih cipela i nabroji mi 10 komada. I još je nadodal – to su ti Joža uvozne srebrne nesilice. Sem ostal bez reči, ali sem ga ipak iskal još malo špagice kaj bi škatulu privezal na biciklina.

Putom sem fest klačil pak sem se sav zešvical, jer sem se žuril kaj se piščenci morti ne bi podušili. Ali ni bilo kvara. Jedino se nisem vupal mam reči Pepici pak sem ih skril v šupu kaj morti ne bi tak jako piskali. Ali kaj bi. Taj čas je došla Pepica k meni pak veli:
– Jožek, kaj to v šupi pišče?
Čim je rekla Jožek, a ne Joža, znal sem da situacija i ni tak huda. A tak i tak joj budem moral reči.
– Je Pepica, sem donesel male čučeke od kuma Lacija pak bumo jajca tržili, a bormeš pemo i v Zagreb, po kunu i pol, pak bu to puno penez.
– Kakvi čučeki, strela Božja vu te pukla, pak šte ih bu ranil i ščim – zakriči moja Pepica, pak onda, kak da joj se malo smililo, onak stiha nastavi:
– Joj kak su mučki, a morti piskaju zato kaj su gladni?
– Nek kaj da su gladni! Ali dal je meni kum Laci male smese, kak je rekel, da se najde za prvu ruku. Pak ih bume naranili. Ali bormeš bume morali i kupiti smesu za mučke piščence, jer to se denes tak dela. A bu trebalo i gajbicu sklepati jer nemreju biti v toj papirnatoj škatulici.

Čim sem rekel da bu nekaj trebalo i kupiti, Pepica se namrgodila i znal sem da bu počela kričati.
– A kulike bu trebalo penez za to kaj bume trebali kupiti; si rekel smesu, pak bu trebalo dati i deske za gajbicu, a bormeš sem vidla pri susedi Faniki da su i letriku spelali kaj bi piščenci vidli zobati. Ja nedam tulike peneze.
– Joj, Pepica, te naj se odmah srditi. Pak se to zove invešticija. Peneze treba uložiti, pa bume zaradili na njimi morti i troduplo. Ovak bume složili! Ti buš dala peneze za smesu pak buš moj srtateški partner, ja bum strupal onoga staroga gredenca pak bum zbil gajbicu. A letriku bume složili od one nočne lampe iz šlafzimera, jer tak i tak si rekla da te je dvaput letrika musiknula kad si ju štela vužgati. A gda bume jajca stržili, ti dobiješ pol penez pak si buš kupila mešnu kiklu a morti i za cipele segne.

Pepicu sem nekak zmekšal čim sem spomenul mešnu kiklu, a ja sem videl da bormeš i ni lehko biti kapitalista. Organezeral sem proizvodnju, kupil sem smesu, a kak je bilo proleće, gajbicu sem saki dan nosil vun iz šupe kaj bi se piščenci na sončeku greli. Su mi rekli da je to zbog vitaminov.
A bile je i lepih cajti. Čučeke bi odnesel vun, pak bi ih iz gajbice pustil na travu pak bi ih ja i Pepica gledeli negda i po jenu vuru.

Moj mali Pepek je dobil malega miceka kaj još ni imel ni mesec dana, a on ga je mam krstil da se bu zval Leonard. Pak je Leonard bežal za piščencima, Pepek za Leonardom, a ja za sima njimi jer sem moral paziti da si skup ne bi strupali Pepičine flance i pelcere. Čak su i mala deca iz susjedstva znala dojti z babicom ili tatekom pak bi detetu kričali – gleč malog čučeka, nu, poveč mu pi-pi, ili, daj podragaj malog miceka, mic-mic… Meni je mam blesiknula ideja da bi moj Pepek mogel naplačivati ulaznice čim tak puno dece prihaja, ili da bar donesu staroga kruha ili nekaj za Leonarda pak bi menje trebale kupiti.
Praf je kum Laci rekel da piščanci buju rasli kak vrganji posle kiše. Prošla su dva meseca pak su dobili i perje i sad se je znale da su sedem piščenki i dva čučeka a jeden još predi ni štel zobati pak se je zatrajal. I Leonard je zrasel a čez prelo na susedovoj lesi od nekud je došla još jena mačkica, pak je Pepica rekla, nek bu, da bu to njezino živinče.

Do sad, se je išle, kak bi rekli, po planu, ali su bormeš došli i problemi. Leonard je fest zrasel  pak je piščence ganjal po celom dvorišču dok jeden ni prhnul prek plota na susedovo dvorišče, pak ga je zgrabil pes. On se je takaj štel igrati, ali gda ga je pustil, same je stepel z nogicami i ostal pri miru. Je, to su več bili gubitki u proizvodnji jer ih je ostale same osam.
Jena je pak piščenka ni mogla na nogice stati. Pak mi se smilila a nisem znal kak da joj pomorem. Prvo sem štel složiti nekšnu protezu da bi mogla hoditi, ali ni bile vajde. Onda sem ju zel v roke pak sem joj nogicu razgibaval, jenu pak drugu. Pak obadve skup. A ni mogla ni zobati, jer ni mogla stati. Pak sem ju ranil zrno po zrno, a vodicu sem joj naleval sa pumpicom koju sem za tu priliku složil. Bojal sem se da me Pepica ne bi morti vidla, a gda me je vidla sem joj se smilil i ja i čučica. Pak mi je još i pomogla jer je rekla da bu to njezina čuča, kučni ljubimec.

Več je bilo za videti kak srebrne nesilice zglediju. Bile su fakat, nekako srebrno sive, ali nekak drobne kak prepelice. Ona betežna, kaj sem ju zlečil je bila još menša, a jena je zgledila kaj da je domača i bila je najvekša. Čučeki su zgledili kaj da su domači, a gda su se počeli tuči, onoga koji mi je bil lepši i nekak miliji bi ostavil vuni a drugoga bi del v šupu, v kmicu, de se primiri. I onda, jeno popodne gda sem išel da bi ga pustil iz šupe vun, dogodilo se zlo. Kak sem otprl vrata, on je onak iz kmice prhnul ravno na mene i same Bogu fala kaj mi ni oči skopal. Doduše, razdrl mi je čelenku, raskrvaril vuho i zdrapal me po prsimi a ja, onak krvav, ravno na ambulantu. Tam sem dobil tetanusa pak čim sem se vrnul, spakeram ja čučeka pa sem ga vrnul kumu Laciju jer mi je ni rekel da je tak krvoločni.


 

Ov drugi, kaj je ostal, počel se je vučiti kukurikati. Od početka, to je bile za smejati, ali pomalem, išle mu je se bolše. Dobil je lepo šaro perje koje ni bilo moči opisati. Na suncu se prelevalo u črno-zlatno, plavo-ljubičasto, črleno, a z repa je bile kaj da ga je namusikal neki naivec. Na nogami su mu zrasle velike mamuze kaj bi se čovek splašil če bi te z njimi zadenul. Krunu je imel kakvu je ni bilo za videti i bila je bar dva puta vekša nek je normalno, a rese pod klunom dotikavale su mu pol žvate. Kočeperil se je po dvorišču kak da mu je kruna kralevska i kak da je znal da su se čuče same njegve. Pak sem ga gledil i rekel – takav more bit same naš, prigorski Čuček iz Slobodne kralevske varoši križevačke.

Gda se nafčil, ste trebali čuti kak je kukurikal. Je to bila mužika zvonkog glasa kakvoga ni mogel ni maestro Štef zaigrati na svojoj tamburi. Jedino mu je bila mana kaj se je počel glasiti v letu ob četrti vuri, pak bi sedamnaest put zaredom ponavlal svoju popevkicu. Moja Pepica je počela jamrati kaj buju susedi rekli jer nemreju spati a rano moraju iti na posel. I ja sem se počel buditi, pak sem čučeka skup z Pepicom klel dok ona ni jeno jutro ponorela pak je onak v unterkikli zgrabila štangu od usisivača i odbežala dole da ga bu morila…

Vrag je zel šalu i moral sem nekaj zmisliti. Bi znal odbežati v šupu pak nakon kaj bi dva-tri put zakukurikal sem ga prijel za kljun a on bi same cmugal i čim bi ga pustil, počel bi z početka. Onda sem se setil rešenja. Ob šesti vuri otišel bi na kavu, a Čučeka bi del v pakettreger pak je išel z menom. Bi znal sedeti pri Vuglecu na terasi, a auto je bil tik do mene. Kava još ni niti stigla a on bi se glasil iz bunkera kak da ga je čuti iz podruma. Gosti bi se počeli zgledavati levo-desno, pak su mislili da im se pričulo. Gda bi se drugi put glasil su gledeli pod stol a ja sem gledil v nebo, kak da od tam nekaj čujem. Kad se je i treči put glasil vužgal sem limuzinu a oni kaj su ostali su mislili da su nori.

Kak je Čuček rasel, rasla mu je i kruna i rese. Tak fest da mu je najemput kruna počela padati na levu stranu pak mu je skroz zaprla oko pak ni videl. Gda je štel zobati, rese su mu pokrile žitek kak z plahtom pak mu je zgledelo da i ni kaj za zobati. Počel je i hoditi nekak na levi kraj, a sve dalše i na rikverc. Dok mu je kruna skroz pala na levi kraj glave zaprlo mu se i oko pak bi skakal same na onu čuču koja bi mu bila z desne strane, pa makar i pet put za redom. Znal je i promašiti, a skoro da mu je bile i sejeno jel ju je munul spredi ili pozadi.

Je, i čuče su počele nesti. Prvo je znesla ona šara, koja je bila kak domača. Čim bi znesla, počela je kokodakati a z njom i one druge kaj su ništ ni znesle pak je zgledelo kak da je puna gajba jajec. I drugi dan je znesla ona šara a srebrne nesilice nikaj. I pak su se kokodakale. Treči dan ni bile nikaj, al su se geldele v nebo i pak su kokodakale. Onda sem se splašil da bi to mogli dočuti financi jer bi im suseda mogla povedati kuliko je pri meni jajec, pak bi mi deli poreza više nek je jajec. Od nesilica, prva je znesla ona drobna, kaj sem ju zlečil, a dan posle, fakat, bile je pet jajec… Čuček je suvereno vladal dvoriščem, a micek Leonard ga je izbegaval jer ni mogel priznati ko je glavni šef. Ni Pepek to ni štel videti, a moja Pepica je bila neutralna. Ona je se skup z nami redovito i dobro ranila i pospremala ono male jajec kaj je bile.

Čuček je se manje jel, a baš se ni vode ni mogel napiti. Kljuknul bi tu i tam koje zrno i videl sem da i tu vrag bere šalu. Kak je imel opasne mamuze, sevzal sem mu noge pak ga del v krilo i počel raniti kak da bi gusku šopal. Vodu je sam pil kad bi mu prijel rese kak ne bi začepile lonček z kojega je pil. I tak se je pomalem privčil na tu proceduru, pak bi gda  je ogladnil došel k meni i same se motal oko nog. Hodil je se smešnije pak je jenput z krunom zadel žicu od ograde, a krv mu je tak tekla da sem se splašil. Brzo sem zel frbante pak sem to nekak zamotal a štel sem i selotejpom nekak krunu zvezati kaj bi mu gore stala. No, se je dobro prešle.
Jeno popodne malo sem si prilegnul i taman da bum zadremal, doleti moja Pepica z dvorišča pak zakriči:
– Joža, čuček je mrl! Puno je dvorišče krvi, a on je tam pod čempresom.

Zletim ja vun, i fakat, več je na terasi bile se krvave kak da bi svinče priklal. Velike kaplje bile su dalše po nogostupu, se do čempresa. A moj Čuček leži pod njim i same još koji put zdehne. Još je bil živ pak sem ga del v škatulu od faksa i bež žnjim na ambulantu. I Pepek je išel z menom. Veterinar ga je tužno pogledel pak mu je pičil nekciju i još nadodal da sigurno ne bu preživel. Doma je ostal v škatulki i još sem mu male glavu potprl z daščicami da je zgledelo kak da sedi. Bila je peta vura popodne i nekak sem ga milo pogledel, kakti zadnji put. A nekak mi je i suza došla. Pred kmicu Pepica je zaprla čuče, a ja se nisem vupal iti v šupu da vidim kaj je z Čučekom. Pak je ona išla zaprti lesu a kad se vrnula same je promucala:
– Jožek, pak Čuček popevle!

Brže sem zbežal vun a Čuček onak v kmici meni – Ko-ko-ko-kooo. Ko-kooo! Tak sem bil zadovolen da sem ga mam kušnul v krunu i valda pol vure nosil po dvorišču i tak sme se spominali.
Drugi dan je bil kak novi pa je i čuče štel jahati, ali moram priznati da baš i ni mogel. Još par put se raskrvaril a ja sem imel spremnu prvu pomoč i led v frižderu, kaj bi mu metal na ranu. Moral sem ga stalne držati na oku jer če bi zakesnil i za njega bi bilo kesno.

Jenoga lepog sunčanog jutra i jesem zakesnil. I za moga Čučeka je bilo takaj kesno. Kak da je sedel, same mu je glava bila prema dole a kruna je ni bila črlena kak krv nek plava. Nije se glasil jer je moj dragi, ponosni, prigorski Čuček fakat mrl. V grlu me je nekaj steglo i nikaj nisem rekel. Nisem ni mojima nikaj povedal, a gda  sem zel štihaču i skopal grobeka nikaj je ni niti trebale reči. I sad gledim njegvega grobeka pod mešalicom i jasne mi je da ni ja, a ni on, nisme razmeli kapitalizma. Nekak nam je bliža bila ljubav, pak makar i ona kokošja.

Srebrne nesilice sem vrnul kumu Laciju, a ostala je same ona šara Pepičina čuča jer je znesla jajec kulike i onih pet. Hodila je  po celem kvartu, pak je pri jenom susedu kljucnula  paradajza, kod drugog probala šalatu, k trečem ode gledit kakva mu je dnevna soba pak se vrne doma. Još uvek je lepa kak i negda, pa je za te i dobila ime Kleopatra. Sad več ime prek sedam let i Pepica veli da je v penziji. Još znese jajce al je menše od golubinjega. Sad ih več ima četiri pak na njimi sedi, a gda znese takav fruštuljek još uvek kokodače da se i denes bojim financev ali bormeš i EU.
Jedino mi je žal kaj moja Pepica nije dobila ni mešnu kiklu, a kamoli nove cipele.

Bilježim se sa štovanjem,
Vaš pajdaš, Joža

Možda vam se svidi

Komentari su zatvoreni.