Izbornik
FacebookTwitterGoogle+RSSYouTube

(Ni)je po Štatutima: Kmica v muzeju ili vu glavama

Naš se križevečki varoš našel zmed sto onih vu celoj domaji kaj je organezeral Noč vu muzeju, al kak se to prispodobilo s Drugim denom horvackih svecov i blaženikof, negdo je štel to pretvoriti vu Kmicu ljudskoga duha. A se to pod maskom brige o našemu duhovnom živlenju. Muzejska noč je počela kak se i nazivle vu Muzeju, negdašnjem Pavlinskom hospiciju i apoteki, a potlam Karasovoj gostjoni. Vu nju je negda zmed dve Svecke bojne znal navrnuti iz belovarskoga Svetoga Trojstva i buduči maršal i precednik Tito, nu o tomu se vu demokraciji ne propoveda.

 Slučajno il ne, dok su muzejalci preksinoč pokazivali kaj se sve more videti vu Muzeju, nestalo je lektrike, kajti je pregorel osigurač. Nu, muzejski su meštri to mam rešili, pak se Noč preselila vu Likovnu galeriju na Nemčičevom placu. Vu negdašnju Sabornicu iliti kraljevsku palaču, kak se to volimo štimati pred stranimi gostima. Tu je mladi pajdaš Ozren obdržal lepo predavanje o križevečkim cehovima, kraljevskim pergamentušima i negdašnjim barjakima križevečkih obrtnikof (koje bi barjake trebalo pokrpati, ak bu ministarstvo kulture dalo peneze).
Tak sme imeli čuti da se bu 10. veljače navršilo pol jezer iliti 500 let osnutka prvoga križevečkoga ceha, š čime se malo koja varoš more pofaliti. Ondak je došlo na red najavljeno predavanje o Pravilniku za bludilišta vu našemu varošu još iz 1913. leta. Pak smo imeli čuti da su se naši stari odavali bludu na kulturni i higijenski način, a ne kak denes vu ilegali pak se za to more platiti globa vu penezima i vu ejdsu.

Nu, gda smo se vre narajcali na zanimlivo predavanje gospon Homen se ispričal da, na žalost, o temu ne bu govoril! Zato kaj su ga puno njih (ni rekel gdo, a moremo si misliti) zvali na tulifon da to ne bi bilo dobro zato kaj su vu istoj galeriji kolajne horvackih blaženikof i svecof. Kajti bi to bilo bogohuljenje!

“Nigdo nam to ne mre narediti vu našoj hiži, nu bumo posluhnuli zbog radi mira vu varošu, pak bumo o bludilištu povedali nekšnom drugom zgodom”, rekel je derektor Muzeja. I pozval posetitelje na tortu zato kaj mu je slučajno tu Noč vu Muzeju bil i rojsni dan. I tu bi morti mogli prestati o temu razglabati, gda nam črv vu riti ne bi dal spokoja. Kajti to ni prvi put da se vu varošu javlaju dušobrižniki kaj povedaju kaj se sme, a kaj se ne sme vu varošu trečega horvackoga sveca. Kak da bi nas, da ne posluhnemo, inače mogla strefiti Strela Božja vu te pukla. Se zmislim gda se negda vu Gornjem varošu služila meša za svetoga Marka oko cirkve nisu smeli biti nikakvi štandovi.

A šteli smo i još očemo biti Međugorje. Nije se vu varošu, pak ni Spravišču, smelo spominati negdašnju travarku Magdu Logomer Herucinu, koju je cesarica i kralica Marica Rezika spasila od lomače kajti su bečki stručnjaki zaklučili da jadna žena ni bila nikakva coprnica.
To je povijest i bilo bi pošteno Magdi, i hiljadama Magdi po celoj Europi, zdignuti spomenika kak žrtvama Inkvizicije, kajti ga još  nigdi nema. Potlam, gda je gornjogradsko dobrotvorno i kulturno društvo počelo obnašati Tikvijade dušobrižniki su poručili da tomu ni mesto ni cajt za Sisvete kajti bi se moglo prispodobiti s amerikanskom Noči coprnica. I gdo zna s koječime. 
Nu, da bi se razmeli, nigdo ni protiv Cirkve, još manje protiv svecof i blaženikof. Nu, ak i jesmo rojsni varoš jednoga sveca to ne znači da se svi moramo obnašati kak da smo veči Pape od samoga Pape.

Gda bi se zbudili mučeniki bi morti i sami rekli da se nisu žrtvovali zato kaj bi im se dizali spomeniki i obdržavali domjenki. I da se tak trošiju penezi dok ljudi ostajeju bez posla, dok nemaju za kruh i mleko, dok se seljakima ne plačaju mleko i šenica, dok se dužnikima skopčava plin i lektrika i prodajeju hiže  zato kaj nisu platili odvoz smeča. Nigdo ne posluhne Očenaša i oprosti nam duge naše, kak i mi opraštamo  dužnikima našima. Varoš ne oprašta komunalnu naknadu. Plača se i za krstitke i za sprovode.

Gdo to ima kmicu vu glavama, pak mu smeta kaj i naš varoš živi vu 21. stoletju, a ne vu Srednjemu veku? Gdo to natirava coprnice, pak bi morti najrajše spravil lomaču za one kaj drugač misliju i kojima ufanje nije politika niti sredstvo do vlastitoga cilja? Komu to smeta pripovedati o bludilištu s početka prošloga stoletja ? Gdo to misli da prihajamo na svet zbogradi bezgrešnoga začeča? Bilo bi smešno, da nije žalosno kakvi bi bili odgovori i gdo bi ih dal. Jer kak se uopče sve to ufaš pitati? Kajti bi mogel čuti da to iz tebe zapraf progovara sam nečastivi. Zato bi bilo najbolše zabraniti sve Noči i preglasiti vekivečne Dane!