Izbornik
FacebookTwitterGoogle+RSSYouTube

Vužgali su Japicu!

Je bile čuti da od kad sme mi scifrali naše trgove da je i nami sekira v med pala, bar kaj se turizma dotikavle. Pak da dohajaju turisti sih fela v velikem broju kaj bi vidli kaj je nigdi ni moči videti.
A je to milina za gledet. Pak su i gradska Mamica povedali da bume iskali „zlatnu rojžicu“ koju bi nam dal gospon Bajs za najlepše scifranu malu varoš v Lepoj našoj, ali i šire. A gda nam daju to velike priznanje, pak buju došli turisti, ali bi mogle biti i mučke problema kak je bile na Vincekovo. Je da je „Štros“ veliki, ali došlo je šest hiljada petsto trideset i jeden turist da  bi videl kak mi režeme lozicu po Križevečkim štatutima v našem novom Paviljonu, a štel je dojti još jeden, ali sme ga morali odbiti jer sme bili prebukerani. Ne kaj se „Štrosa“ dotikavle, tam bi ga još i nekak nagurali, nek zbog radi smeštajnih kapaciteta i ugostiteljske ponude. I tu su Mamica deli roku na srce pak su priznali da sme zbog radi pretvorbe gostionu „Zagorje“ pretvorili v buduči muzej Krvavoga sabora križevačkog, a tam gdi je negda bila gostiona „Križevački štatuti“, složili sme likovnu galeriju, a turisti nemreju jesti naše špecijalitete iz slika. I „Križevačku pivnicu“ sme morali zatrti jer je ni smela biti kraj Arhiva kad si zname da kultura i pijača nejdu skup.
Kaj se hotela dotikavle, Mamica su rekli da zgledi nekek ofucane, pak je baš ni spodoben da bi nekoga tam pelali.

Kak je pri nam navek pamet imela glavnu reč, več je i predi pal predlog da složime nove birtije, a jena bi se mogla zvati „Pri mrtvom kostanju“, a locerali bi ju tam gdi je banka jer tak i tak penez je ni da bi šparali, a kreditov je i onak preveč pak ih nemreme odplačivati.
Druga bi se birtija mogla zvati „K črlenoj bukvi“ a nju bi locerali v našem novom paviljonu jer je tak i tak predrobni da bi služil za kulturu kak su predi mislili. To bi zapraf bil kavič, a če bi se još nadodal dimnjak, mogli bi delat i čevape v somunu, a gda več ima dimnjaka, bila bi to i puši ona.

Meni se pak najviše zdopala ideja da složime novoga hotela na gornjoj ledini mam tik do cerkve sv. Križa, a na doljnjoj ledini pri zdencu bi zezidali binu od pleksi glasa kaj bi bila sva zaprta pak bi manefeštacije mogli delati cele godine, a se bi se vidle i z vuni i z nutri. A hotel bi imel same osam katova tak da bi se s ove južne strane videle i male tornja. Pak gda bi turisti došli v hotel bi ih mogli usmeriti, več prema njihovimi željami. One pobožne bi čez severna vrata z hotela pustili v cerkvu, i to bi onda bil verski turizem. Za one koje zanima kulturni turizem, otprli bi konferencijsku dvoranu v hotelu pak bi im prikazivali filmove da glede kakve sme mi negda imeli trgove i parkove koji su sad postali povest. A navrnul bi i Profesor, pak bi im održal zdravicu kak je v starom i slobodnom kralevskom varošu Križevcu i  red da ima biti.
A kak turisti nisu nigda zadovolni s ponudom, složili bi im i turističkoga paketa, pak bi jene pošiljali da vide najstarešu gospodarsku školu na Balkanu, a drugi bi išli na bazene pak bi se kupali i igrali nogometa, na Bukvičevom igrališču. To bi bil rekreativni turizem.
Ali ni to nije se. One najhrabreše pelali bi na našega novoga rotora, pak bi ih vrteli v krug tak duge dok ne bi priznali da toga još nisu doživeli. A to bi v paketu zvali avanturistički turizem.

Još dok su Mamica držali slovo na Vincekovom, su dali proglasa da pozivaju se Križevčane, a i one šire, da bi se zemaskerali i došli na Križavački Fašnik v našu malu Varoš, kak bi opet vidli čuda ne viđena. A kak turisti znaju biti i cendravi, jeden stareši gospon su Mamici  upali v reč i mam rekli da im i ovo spelavanje zgledi nekak čudne čim su trseka deli v teglin i zalevali s Kolom mesto z domačom graševinom. Pak da ni klobasa ni bila domača nek nekakva uvozna z onog stranjskog dučana kaj ga zoveju Market. A čovek ni do kraja ni povedal kaj je imel za povedati, pak je i jena bakica počela kričati da gda bu ona vidla Križevce. Jer da je v „paketu“ pisale da bu Vincekovo v Križevcu.  Pak su joj naša Mamica šteli dopovedati da več je v Križevcu, ali da je male ostarila pak je pozabila kak Križevec zgledi. A bakica kak bakica, štela se je i karati pak je kričala da v Gradu treba biti park i drevljiće, i cvetiče i starinske klupe a toga je ni za videti. A da se ona toga seča jer je negda pri nam zbavljala nauke. Onda se za reč javil još jeden turist, a makar ju mu nišče ni dal, je povedal da tak mora biti, jer su te novi vidiki več za 22 stoleče. Ma kaj god, ni bil turist, je bil domaći z Magištrata, ali je zgledelo kak da je turist koji ni pri sebi.

Da bi se zbegli si problemi kaj se dotikvle turistov a i šire, su Mamica rekli da buju delali Projekta, pak se bu se v napred znale. A čim ima Projekta, onda  treba složiti Radionice, pak bu se išle po Projektu. A pri Projektu je glavna ideja, a če je on v redu, i penezi se buju našli.
A narod kak narod. Još od negda se mi volime maskerati, pak su z Gornje varoši na kočijami dohajali v Doljnju Varoš, pak da se održi tradicija, bi i sad tak mogle biti. Radionica bu delala kostime i zmislila huncutarije, a se skup moralo bi biti lepše nek kaj buju složili v Doljnjoj Varoši.

Druga Radionica bi bila pri Magištratu. Ali tam su mam nastali problemi jer se pozicija i jopozicija nikak nisu mogli složiti šte bu i kak glumil. Onda su jeni povedali da bi si trebali skinuti stare maske jer ih celoga leta nose, pak iti brez maski, a drugi su kričali da je treba složiti nove jer da je narod već neke zamaskerane prepoznal. Još su se karali če je pamatno da nastupi celi Magištrat, ali tu su se brze složili i jeni i drugi da si nesmeju iti jer bi ih nešče mogel i prebrojiti, pak bi mogle ziti da ih je preveč.
Kak dogovora baš i ni bile, gradski su Japica naredili da bu onak kak oni veliju. A tema i poruka bu; novi vidiki v bolšu budučnost. A šte to more bolše dočarati nek Japica jer tak i tak se ide z njihove pameti. No, za saki slučaj, pred vratimi Magištrata bu stajala Gradska straža, a Japica buju stiha došli i same se zmešali v prošeciju gda dojde. To bu mam sprečile da ga obožavateli ne bi počeli kuševati na javnom mestu, a i oni drugi, kaj bi, nedaj Bože, mogli imeti i drugih namera, buju odustali jer gda vide one deklice v Gradskoj straži bu im došla milina pak bi ostali paralezerani na licu mesta.
Tu su našem Japici još sugererali da bi predi nek predaju vlast Varoškom sucu još mogli i službeno otprti „Nemčića“, pak bi zgledelo kak da je bilo a ni bilo jer je Fašnik.

Radionica v Doljnjoj varoši je najkasneše počela z radom. Kakti prvo, poslali su špijune v Gornju varoš da bi vidli kaj oni delaju, pak da zmisle nekaj drugo, ili da slože to iste, same malo bolše. Nije da oni ne bi imeli „štofa“, kaj god, bile ga je čak i preveč. Ali čak i iz proverenih anonimnih izvora je ni bilo moči saznati kakve su im podle namere, pak je manje-više se ostalo v konšperaciji.
Se skup, pripreme su fanj duge trajale, i treba je priznati da su si dali se od sebe. Pak još i male više.


I došel je dan gda je Križevačka maškarada mogla početi. Prema novom Projektu se je, kak i negda, trebalo početi v Gornjem Gradu, ali ne pri lipi nek na rotoru.  Hižna su Mamica prema Projektu trebali ravnati sekulikom prošecijom, a kak su doma tam pri rotoru su mislili da je dosti deset minuta da bi stigli na posel. Ali kaj god. Kak je rotor na županiskoj cesti a prilazne ceste od stanovnika prema rotoru su tak zmešane da ni sama ni znala kam je treba iti, je odišla krive, pak je zakesnila celih deset minuta. I manefeštacija je več kesnila.

Protokol je bil skroz jednostavni. Čim bi nešče došel na zborne meste, mam bi se vklučil v krožni tok i tak bi se roterali dok si ne stignu. I bi se vidle da je se nekak žive i da ih pune ima, makar se isti same vrte v krug.
Na čelu prošecije su bili motori, ali su se pelali skroz stiha da bi se čula plehnata mužika koja se još ni vklučila v roteranje, jer ne bi onda mogli sopsti, pak bi im visoki „C“ zvučal kak da su razštimani. 
No, sad je već bile za videti kaj je koja Radionica spremila za pokazati. Pesjaki su šteli pokazati da im je glavna orijentacija na izvoz i selski turizem. Ne zate kaj bi oni bili seljaki, nak zate kaj to znaju delati. A pri izvozu delaju baš one o čem Lepa naša more same senjati. Izvoze pamet. Pak su scifrali kravsku zapregu z jenim napol strganim kotačom koji je zacukival, a sa sake strane kola deli su kažiroku. Na jenoj je pisale same „Magištrat“ a na drugoj „Županija“, a valda su mislili na našu. Na kolima su sedela dva gornjogradska muža, i jeno žensko stvorenjiče kaj je imelo masku i zgledelo kaj plunuta naša Mamica. A za muške ste i sami pogodili. Ni da oni nisu imeli i konje v Gornjoj varoši, nek su šteli pokazati da nam taj izvoz ide pomalem, baš kak i kravice gda hodiju, a strgani kotač je sugereral da tu nekaj još i šepa, pak bi trebale pobolšati.

Na drugoj zapregi z Gornjogradske Radionice je bila krušna peč z koje se je dimile a na deski iza kočijaša je sedela gazdarica z „Lipe“ i još jena gornjogradska gospođa, a obadve su bile v starinskoj obleki. V krilu su držale prazne protvanje od štruklov jer su ih besplatno podelile još predi i nek je prošecija krenula. A tak je i predi znale biti. Čim bi v „Lipi“ složili štrukline, bi došli oni z Doljnje varoši da bi vidli kakti kulturu, a gda bi se najeli su mam odišli jer ih kultura ni preveč zanimala.
Bila su i treča kola, onak brez bočnih stranica, kak se nagda v šumu išle, a na njima su bili trupci, dobrih tri kubika. Tak su Pesjaki šteli reči da su i njimi posekli kostanje, ali ih je još tulike ostale da ih imaju i za izvoz, a da bi pomogli Doljnjoj Varoši pri novom pošumljavanju.

Tu je treba spomenuti da se dogodil i jeden incedent još gda su prva kola uklučili v roteranje. Pisava, koja je bila z leve strane zaprege se je splašila motorov, pak da oprostite, se je mam posrala na rotor, a urbanisti su to svatili kak uvredu i prvokaciju, pak su se zaprege isklučili   iz roteranja dok prošecija ne krene zapraf.
Najvekšu pomutnju je složil avtobus Posmrtne pripomoči gda je stigel z Doljnje Varoši. Moral je stati još predi rotora, a z njega su zišle 24 spodobe za koje je nešče od informeranih rekel da su to mrtvi kostanji pak da buju i oni išli v prošeciji. Još su zvadili i les brez poklopca, a v njemu je ležala mrtva Črlena bukva na mrtvečkim kolicima. 
Došel je i Bibliobus, a to je Radionica Doljnje Varoši štela pokazati kulike daje za kulturu. Pak su z njega zišle male deklice z krilimi, kakti čmelice, a potlam njih i pristala ženska, ali ozbilna kak kultura i mora biti, pak su za nju rekli da je to Matica. A pred sobom je imela nekšna kolica kak ona v samo poslugi, a na njimi veliku knigu na kojoj je pisale „Narodno stvaralaštvo Križevčana – treče izdanje.“ Slova su bila onak starinska, v zlatnom tisku.

Još su došla i jena menjša kolica na kojima je bil same jeden kruh, a oko njih se je osem deklica v narodnoj obleki držalo za roke kak da tancaju v kolu. Oni zlobni su mam rekli da su to složili v Radionici od Magištrata, pak su same podmetnuli onak potajne. A oni još zlobneši su nadodali da bi poruka trebala glasiti – kruha i igara. Pak nam oni organezeraju igre, a kruha si bume sami poiskali, pak makar i v kontejneru.
Bi čovek nabrajal tu lepotu do popodne da se najnput ni čul glas koji je zagrmel:
– Dosti sme zamudili. Šte je došel, došel je. Nami je fletne za iti da Japica ne bi preveč čekali – a bila je to hižna Mamica koja je komandu zela v svoje roke.

Plehnata mužika je mam zavzela svoje mesto na čelu kolone i počela se roterati. Za mužikom su bili motoristi, a med njih se je zmešal i jeden terenec, onakav kakvoga pelaju tajkuni, ali je bil prazen, same je imel šofera.
Pak su onda jena za drugimi upadale zaprege, pak Posmrtna pripomoč, pak si ostali, a prednji del prošecije je več krenul.
Turisti su stajali v špaleru, skroz čez županisku cestu, tam do „Nemčića“ a mediji su se razleteli na se strane kak bi vudrili ono najbolše na kipec.
Jedino se pri „Videi“ v Gornjoj Varoši složila nekakva gužva, a turisti su kričali da su šteli popiti  šabesu  ili kupiti Križevačke štrukle, pak su opet jamrali da nam je ponuda nikakva. Onda je jeden domaći, koji je bil na obloku i lukal čez firungu kaj se događa, otprl obloka i rekel turistima da kaj su nepismeni, a na vratima piše da je štacun zaprt zbog radi globalizacije.

Nišče ne zna šte je v prošeciju podmetnul i tri raspuštenice, ali oni pametneši mam su se zmislili da bi to trebale podsetiti narod da sme mi još A.D.1903. imeli kupleraj kak organezeranu turističku ponudu, ali radi pomanjkanja turistov v to vreme, usluge su koristili domaći. I kaj sad? Gda su več došle, jeni su lukali da  bi kaj bolše vidli, a kak su imele velike dekolteje, ono im je skakalo čas vun, pak opet vnuter. Oni pobožni su obrtali glave na drugi kraj, a gda su došle do župnikove hiže, on je iza firunge počel moliti i stalne je ponavlal – Gospodi pomiluj, Gospodi pomiluj…!
Pri Magištratu su motori zastali tek tulike da su gradski Japica moglu vlesti v tajkunskoga Rovera, a gradska straža se je rasporedila okolo njega.


Na „Nemčiću“ su stvar v svoje roke prevzeli hižni Japica, kak bi hižna Mamica leže sopla nakon dugačkoga štrapaca, a i po Protokolu Križevačke maškerade tak je trebale biti. Sad više ni bile cajta za dangubiti, pak su hižni Japica mam prešli na stvar.
– Prepoštuvani gospodo i drugovi turisti, dragi domaći koji god bili, i cenjeni mediji kojih kak i obično je ni …. dozvolite mi … – i sad i sami znate kak to več ide – da predam reč našem uvaženom gradskom Japici, da oni predju reč Varoškom socu, kak bi osodili Fašnika za se zlo kaj nas je strefile ovoga i sih prijašnjih leta dok su oni bili na vlasti.

Još predi toga ceremonijala, gda su mele odehnuli, hižna Mamica su postrojili prošeciju okolo Kipahovog ringlšpila, a v prvom redu mam do gradskog Japice je bila straža, pak polek njih mrtva črlena bukva v lesu okružena s mrvim kostanjima.
Same je jeden domaći primetil da su Mamica na čas zginuli, a zgledi da su tri raspuštenice otpelali na pelinkovec v obližnu birtiju kak ne bi bile na oku ovom tu župniku. A bi ih fakat videl jer je i on bil v prošeciji, a predstavlal je naše sportske uspehe pak je bil na čelu nogometne reprezentacije koja postiže čak i svetske rezultate. No je, nisu ni njega mam prepoznali jer je spodi gač oblekel štrampice, da mu noge ne bi pozeble, a morti i šire, jer je bile spodi nule.

– Dragi moji pajdaši i prelublene pajdašice! Dragi moji birači, koji jeste i niste glasali za mene,    – prevzeli su reč gradski Japica, a masa naroda se nekak uskomešala i počela kričati – nisme, nisme! A gda se graja male stišala, čula su se i dva glasa koja su skorem šapteči rekla – jesme, jesme! Ali narod ih je ni obaderal jer je znal da su oni z Gornje Reke.
– Mir, mir! Prosim za red i disciplinu – pak su se oglasili hižni Japica – pak prosim da bi gradski Japica nastavili dalše.

– Pozdravlam i totu prisotne gradske načelnike, pročelnike i začelnike, se moje desne i leve roke, kao i stručne suradnike koji su mi pripomogli da služim narodu i provodim njegovu volu. A se to – zbog vas. Pozdravlam i se one kojima sme složili vodovoda, letriku, kanalizaciju, mrtvačnicu ili avtoputa do hižne numere.
Denes sme se zebrali da proslavime naše uspehe na sim poljima našega rada, ali i da kretizeramo pak i kaznimo onoga koji nam je napravil zla, a to je Fašnik. Pak nek ga Varoški sodec osode, da bi pravda bila zadovolena.

Najenput se je z lesa digla mrtva črlena bukva i zakričala:
– Tebi, tebi je treba soditi. Pak ni Turci nam nisu složili tulike škode kak ti za svoga mandata -a mrtvi su kostanji zauzeli borbeni položaj.   
Na to je i gradska straža isukala sablje i okrožila gradskoga Japicu, i šte zna kaj bi se zgodile da se opet nisu umešali hižni Japica.
– Prosim za mir i tuleranciju! – Pak su si Japica poravnali cilindra jer su zamalem i opali, a zgledelo je i kak da su šteli pobeči. – Nezafalnici jeni! A kome su gradski Japica složili ovoga trga nek vami. Šte vam je otprl nove vidike, kakvih je nigde ni za videti gda bi gledeli i 100 kilometrov okoli?… – i opet je ni stigel povedati do kraja, a čul se je još jeden glas:

– I tebi je treba soditi! Kaj misliš da te nisme prepoznali? Pak ti si onaj koji je donesel benzina za motorke gda su nam poharali kostanje. Pak da se kak god zamaskeraš, mi te bume prepoznali.
– Soditi, soditi – čula se je graja – ali nek sodi narod. Varoški sodec su tak i tak zkromperani skroz na skroz.

Več se je i predi vidle da nekaj ni v redu. Čim su Nemčiću prek oči svezali robca da, kakti, ne bi videl kaj se tu događa, znalo se je da tu svoje prste ima križevačko podzemlje. A do kud su oni spremni iti, to je same njimi poznato.
Je da su delali inicijativu, pak su rekli da je ni smeti križati Križevce, a oni drugi se povedali da je Grad imel dušu a sad ju više nema, a bile je onih koji su rekli da buju i črleni kostanji lepi gda za 100 let narastu. Pak čovek ne zna kome bi veroval.
– Ja predlažem da gradski Japica simbolično otpru našega novog „Nemčića“ obrtanjem Kipahovog ringlšpila, pak naj nam prosvetli hiladu lampica naše svetle budičnosti. – Tu se je protokol male zmešal, ali kak se je hižna Mamica najbolše snašla, a hižnog je Japicu ni bilo za videti, gradska je straže napravila novoga špelera od gradskoga Japice do ringlšpila. Pak su oni v tri koraka došli i seli na klopčicu, i prijeli se za volana kak bi mogli obrnuti inštelaciju…

V taj čas bile je čuti podzemnu grmljavinu, a zemlica se je raspuknula pak se je složile gliboke prele ravne v staru kanalizaciju. Ringlšpil se ja nagnul za 86 stupnja prema prelu, a Japica su same zmahali z nogami i naglavce nestali v nutri. Deklice z Gradske straže su počele kričati, a dve kaj su ostale prisebne su Japicu prijele za noge i zvlekle vun. Bormeš su se Japica i uneredili jer je v nutri bile koje kakvih zaostatkov još morti od Bele četrtog, a i posle njega…

Turisti su se pak čudili i rekli da se to more videti same pri nam, a mediji su več predi vužgali vatrice kak bi mogli slati dimne signale v redakciju. A procurele je i z podzemlja da buju skurili Japicu, ali na moderni način. Pak su lektrode od ringlšpila zeštekali na stolec gdi su Japica trebali sesti, a čim bi jenput obrnuli kotača, to bi postal letrični stolec pak bi sam sebe skuril.
A morti je i bolše tak, jer posel na „Nemčiću“ još ni zbavlen do kraja. Pak bume vidli. A oni kaj igraju loto, navek se nadaju onoj – više sreče iduči put!

 

Bilježim se sa štovanjem,
Vaš pajdaš, Joža