Izbornik
FacebookTwitterGoogle+RSSYouTube

Naj im bu, naj bu, naj bu im žal…

Gda me je pajdaš Pjer pozval na kazališnu predstavu s glazbom i popevanjem svojih peteespeovaca mislil sam si da bum očel samo zato kaj sem mu to obečal, al da ne bum bogzna kaj imel videti i čuti. I mam bum rekel da sem se razočaral i to vu sebe samoga zato kaj sem nepravedno sumnjal vu dečke. Kajti su me navfčili da ne smem sumnjati predi sem nekaj videl i čul i još pogotovo ak je to spravlano z dobrom volom i s dobrom namerom.

Negdo bu rekel da je to pravo čudo i da dečki to trebaju zafaliti Svetomu Marku čije ime nosi njihova udruga. More biti da i je tak, nu da se oni nisu prijeli posla bez straha da im se negdo bu smejal kaj delaju norca iz sebe, ne bi čuda ni bilo. A mislim da baš vu tom grmu leži zajec. Znali su zrušiti vu glavi se ono kaj su sami ili s nekim zazidali, pak su zboradi tega posumnjali da nekaj ž njima ni v redu. Zato kaj nemreju spati i kaj im se po noči vu pameti sakojake črne misle roje kak vinske mušice.

I gda sem o tomu čul Pjerovu peteespeovu priču morem samo reči, dragi pajdaš Pjer ti si hiljadu posto normalan. Morti to nisu oni kaj nam saki dan glumiju da su zaslužnejši i spametnijši, da su po nečemu prosvečeni, pak nam moreju pripovedati bajke  i basne, kak da se obnašamo vu živlenju. Naši dečki su pokazali da ne glumiju, da ne recitiraju i ne popevaju za peneze iz varoške ili županijske i državne kase, nek zato da ne moraju gutati aspirine i antidepresive.

Prepoznal je to i psiholog Milan Čapalija kaj vodi njihovu terapeutsku grupu. Najbolša medecina je zvleči iz sebe ono kaj je nuter čučalo skrito, morti stihoklepec, popevač, glumac, komedijaš. Pak zakaj ne ? Na predstavi vu prepunom Horvatskom domu nasmejali su nas Pjer, Mato, dva Željka, Draženko, dva Siniše, Gudić, iliti Dragec, Nada, Joža, Franc, Đuro. Car je izložil svoje karikature, a Nenad granitne radove.

Je, smejali smo se, al ostala je  i špranja. Kak su ti dečki smogli kuraže  da pred svojimi sugrađanima, pred familijama, pred suborcima z rata, susedima, pred poznatima i nepoznatima, priznaju da su i oni, negdašnji junaki, bili slabi? I kak su smogli kuraže da pobijede  sebe same? I ne samo to. Pokazali su varoši i inštitucijama da bi se i drugi mogli na njih ugledati, da varoš ima kaj od njih nafčiti i da im treba dati poverenje i za druge prigode, kak su Đurđevo pod lipom ili Spravišče. I zato skidam škrlaka Josipu Petrliću-Pjeru, svestranom umjetniku, kantautoru, spisatelu, pripovedaču, glumcu, režiseru koji je u svom živlenju prešel nekoliko života. I naj bu žal sima onima kaj vu petak navečer nisu bili vu velikoj dvorani Horvatskoga doma. Naj im bu, naj bu, naj bu im fest žal!